Галоўнай навіной Оршы ў жніўні стала прызначэнне новага кіраўніка Аршанскага райвыканкама. Замест Аляксандра Пазняка кіраваць раёнам Лукашэнка паставіў Ігара Ісачанку — вельмі закрытага чалавека, які практычна не дае інтэрв'ю і з біяграфіі каторага мала што вядома.
Урэшце, прыезд Лукашэнкі і справакаваў вялікія змены ў горадзе і раёне. Спачатку прэзідэнт учыніў "разнос і разгон" на Інструментальным заводзе, дзе бэсціў паказуху і пагражаў міністру турмой, затым перакінуўся на бараньскую "Тэхніку сувязі", адзін ў кабінетаў якой назваў "туалетам". Але на такіх азначэннях кіраўнік дзяржавы не спыніўся, ён убачыў на прадпрыемстве "мышэй, прэзерватывы і іншую наркату". Услед за візітам пайшлі кадравыя перамены ва ўрадзе. Палітолаг Валер Карбалевіч палічыў, што Лукашэнку ў нашым горадзе сустрэлі дрэнна, вось таму ён і раз'юшыўся.
Не абыйшлося і без трагедый на дарогах. Увечары 20-га жніўня на вуліцы Леніна пад аўтобус трапіла пенсіянерка. А пад Оршай 1-га жніўня пасажырка аднаго з аўтамабіляў згарэла проста ў кабіне. Потым у шпіталі сканаў кіроўца аднаго з аўтамабіляў. У выніку ўсе пацярпелыя ў аварыі адправіліся ў іншы свет.
Нашы карэспандэнты ў жніўні заклапаціліся лёсам дома-фантома ў самым цэнтры горада па Леніна, 32. А 18-гадовы аршанец у Менску пашкодзіў два аўтамабілі "на эмоцыях" пасля сваркі з дзяўчынай. Споўнілася 40 гадоў з дня бронзавых медалёў бараньскага "Тэмпа" ў чэмпіянаце БССР. Загадчыца музею Караткевіча Ліна Гатоўская палічыла, што дом вялікага пісьменніка на аднайменнай вуліцы не гістарычная каштоўнасць, і гэта выклікала больш за сотню каментароў пад матэрыялам, дзе аршанцы спрачаліся, ці мела яна рацыю.
