Петыцыя грамадзян Оршы да Аршанскага райвыканкаму часткова дасягнула поспеху. Аршанскі райвыканкам перастаў займаць пазіцыю непрыняцця беларускай мовы і правядзе разам з Аўтобусным паркам № 3 анкетаванне грамадзян, на якой мове яны хочуць чуць абвесткі прыпынкаў у грамадскім транспарце. У сваім адказе грамадзянам першы намеснік старшыні Аршанскага райвыканкама Сяргей Пац не паведаміў, якім чынам будзе праведзена анкетаванне, верагодна, падрабязнай інфармацыі варта чакаць у бліжэйшы час.

Паводле грамадскіх актывістаў, якія падпісвалі петыцыю і з якімі звязалася рэдакцыя Osha.eu, справа нарэшце зрушылася з мёртвай кропкі, бо раней выканкам цягам некалькіх гадоў проста ігнараваў патрабаванні аршанцаў і спасылаўся выключна на закон аб дзвюх дзяржаўных мовах, ніяк не выкарыстоўваючы пры гэтым беларускую мову. Аднак казаць пра нейкую перамогу яшчэ занадта рана — шмат залежыць ад празрыстасці і ахопу анкетавання, абяцанага мясцовымі ўладамі. Актывісты перакананыя, што ў адкрытым галасаванні без накруткі галасоў пераможа менавіта беларуская мова, бо «аршанцы, хоць у большасці сёння размаўляюць па-расейску, бачаць недахоп беларускай мовы ў грамадскай сферы, у тым ліку ў транспарце. Акрамя таго, сярод аршанцаў вялікае мноства патрыётаў сваёй краіны, якія разумеюць цану незалежнасці і важнасць беларускай мовы ў роднай Беларусі».