Нагадаем, што названы ролік выйшаў амаль месяц таму на тэлеканале "Белсат", а нядаўна стала вядома, што ў вырабе гэтага роліку падазраюцца двое жыхароў Віцебска Віталь Скрыль і Ўладзімір Лунёў. Ужо заўтра - у панядзелак 19 лютага - іх выклікаюць у суд Кастрычніцкага раёна Віцебска. Але пратакол з якім паспелі азнаёміцца "падазраваныя" выклікаў у іх шэраг пытанняў. У сваім інтэрв'ю для сайту Беларускай асацыяцыі журналістаў Віталь Скрыль распавёў, што не хоча пакуль што распавядаць пра ўсе "загадкі" пратакола, але агучыў некалькі з іх. Па-першае, не зусім зразумела чаму артыкул, які гучыць як "незаконны выраб і распаўсюд прадукцыі СМІ" ў дачыненні да іх папалавініўся - Скрыля і Лунёва падазраюць толькі ў "вырабе". У якасці месца дзе адбыўся "агляд месца правапарушэння" пазначаны ў пратаколе пакой у будынку міліцыі, а не плошча пра якую казаў сведка запісаны для пратакола. Атрымліваецца, што "фрагмент інтэрв'ю", які і выклікаў пытанне ў аршанскіх міліцыянтаў запісваўся ў пакоі міліцыі. Да сведкаў таксама ёсць пытанні. У пратаколе пазначаны прозвішчы трох сведкаў, а дапытаны чамусці толькі адзін. Пры гэтым, Віталь гаворыць, што калі яны знаходзіліся ў Оршы, то заўважылі, што за імі сочаць, а ў пратаколе пра назіранне нічога не гаворыцца. Таксама цікава, што адміністратыўныя працэсы ў нашай краіне ідуць па месцы здзяйснення правапарушэння, а ў дадзеным выпадку разглядаць будзе справу не Аршанскі, а Кастрычніцкі суд Віцебска.