Турыстычны цэнтр "Дортур" Менскага аддзялення Беларускай чыгункі — тое, што часта чуюць госці Менска на чыгуначным вакзале. Аб'явы кампаніі датычацца ў асноўным экскурсій па сталіцы. Цяпер цэнтр распрацаваў адмысловы турыстычны маршрут "Орша - горад чыгуначнай славы".
Падчас экскурсіі ў наш горад гасцям будуць распавядаць, што Орша - усходняя брама Беларусі, найбуйнейшы ў краіне чыгуначны вузел. Натуральна, знаёмства з Оршай не абмяжуецца толькі наведваннем лакаматыўнага дэпо і чыгуначнага вакзалу. Прадугледжаны і шпацыр па цэнтры Оршы, экскурсія ў музей "Млын" і ў музей Уладзіміра Караткевіча, а таксама іншыя мясціны горада.
