Вытворчасць па выпуску дыскаў для металаапрацоўкі атрымалася стратнай для дырэктара аднаго з прыватных унітарных прадпрыемстваў. Бізнес-план быў складзены такім чынам, што створаная ім з кампаньёнамі таварыства з абмежаванай адказнасцю залезла ў даўгі. А вяртаць пазыкі было ўжо неабходна, і 36-гадовы аршанец, шматдзетны бацька пачаў прасіць усіх знаёмых браць для яго крэдыты. Для таго, каб банкі верылі і выдавалі крэдыты без залішніх пытанняў, сам прадпрымальнік раздаваў знаёмым і сваякам фіктыўныя даведкі пра заработную плату. А даўгі ААТ тым часам перавысілі ўжо 200 беларускіх рублёў. Дзеля фіктыўных даведак выкарыстоўваліся рэквізіты і пячаткі двух розных прадпрыемстваў.

Банкі, у якіх падавалі дакументы на крэдыт сваякі і знаёмыя прадпрымальніка, выдалі ў агульнай суме 15 крэдытаў. Гэта былі банкі ў Оршы і ў Менску. Акрамя таго, мужчына вырашыў падмануць і два кансервавых завода. Магчыма, ён звяртаўся і да іншых прадпрыемстваў, але менавіта два кансервавыя заводы пагадзіліся на яго прапанову. А тая была простай надзвычай: мужчына бярэ частку прадукцыі і рэалізуе яе на тэрыторыі суседняй Расеі. Натуральна, па больш высокім кошце. Такім чынам ён здабыў сокі і кансервы на 50 тысяч беларускіх рублёў. Рэалізаваць іх не атрымалася, а, магчыма, махляр і не дамагаўся гэтага. Хаця на судзе ён заявіў, што хацеў прадаць прадукцыю, але тэрмін прыдатнасці кансерваў сканчаўся, і яму нічога не заставалася, як прадаць кансервы ніжэй за іх сабекошт. У выніку грошы засталіся на аплату арэнды складаў, а на разлік з заводамі грошай не хапіла.

У выніку, суд пастанавіў — няўдалы прадпрымальнік адпраўлены на 3,5 гады ў калонію ўзмоцненага рэжыму з канфіскацыяй маёмасці.