Упраўленне следчага камітэта па Віцебскай вобласці расследуе ўсе абставіны разбойнага нападу, які адбыўся 27-га лістапада 2015 года ў вёсцы Юрцава. Тады двое невядомых мужчынаў зайшлі ў памяшканне страхавой фірмы з прадметамі, падобнымі да біты і пісталета. Яны збілі наведвальніка і пад пагрозай прымяненне пісталета забралі ў мужчыны 300 000 расейскіх рублёў і 5 тысяч даляраў ЗША. Акрамя таго, як сведчыць фотаздымак канфіскаванага ў "гангстэраў", сярод "спажывы" былі і залатыя ўпрыгожанні - ланцуг і пярсцёнкі, а таксама беларускія рублі.

Пасля разбойнага нападу бандыты схаваліся з месца здарэння на машыне, гэты момант зафіксавала камера вонкавага нагляду.

Следчыя кваліфікавалі дзеянні 26-гадовага і 29-гадовага мужчынаў як разбой, здзейснены групай асобаў з мэтай завалодання маёмасцю ў буйным памеры. Розшук падазраваных паказаў, што абодва хаваюцца на тэрыторыі суседняй РФ, што нярэдка здараецца са злачынцамі ў беларуска-расейскай прыгранічнай мясцовасці. 29-гадовы абвінавачваемы быў экстрадаваны ў Беларусь для правядзення следчых дзеянняў, а 26-гадовы ў Расеі трапіўся на яшчэ адным злачынстве, і цяпер Следчы камітэт вылучыў ягоную справу ў асобную вытворчасць.

Пасля таго, як абвінавачваемыя азнаёмяцца з усімі матэрыяламі, тамы крымінальнай справы будуць перададзеныя ў суд.