Днём у панядзелак - 12 верасня - Віталь Паўлаў, які за дзень да таго быў назіральнікам у школе №5 быў затрыманы, быццам бы, за тое што нецэнзурна выражаўся на выбарчым ўчастку. Затрыманы ён быў каля крамы "Старт", калі ішоў на аўтобусны прыпынак. У РАУСе на яго склалі адміністратыўны пратакол за дробнае хуліганства.
Насамрэч, абвінавачанне выглядае сумніўным - на ўсіх выбарчых участках прысутнічае супрацоўнік міліцыі, які пры скандале мог бы затрымаць назіральніка. Тым больш, што і самі старшыні камісіяў - а ў пратаколе запісана, што менавіта са старшынём камісіі, яна ж дырэктар школы Вайцэховіч Наталля Аркадзьеўна, і адбылася нецэнзурная сварка - любяць выдаляць незалежных назіральнікаў з участкаў перад падлікам галасоў па самых дробных прычынах.
Тут жа сітуацыя выглядае так: назіральнік па матэрыялах пратакола "громко выражался нецензурной бранью, кричал, нарушал общественный порядок и деятельность участковой комиссии, на сделанные замечания не реагировал, продолжал своё противоправное поведение". І ў гэтай сітуацыі старшыня камісіі і міліцыянер праявілі поўную бездапаможнасць і нават не выправадзілі Паўлава з участка. Ён спакойна дабыў на ўчастку да канца падліку галасоў. А ўсе прэтэнзіі да яго з'явіліся толькі на наступны дзень.
Па меркаванні самога Віталя Паўлава, супраць яго была арганізавана правакацыя, хутчэй за ўсё, такім чынам міліцыянты імкнуліся перашкодзіць яму патрапіць у Мінск на акцыю пратэсту супарць фальсіфікацыі выбараў, якая адбылася 12 верасня.
