Мы ўжо паведамлялі, што ў ноч з 21-га на 22-е студзеня ў Аршанскім раёне адбылося дзве аварыі, ў выніку каторых загінула 2 чалавекі. Факт другой аварыі падцвердзіла міліцыя.
Аварыя адбылася прыблізна ў той жа час, што і тая, пра якую мы ўжо пісалі падрабязна - каля 1 гадзіны ночы - на трасе Е95 каля вёскі Грышаны. Жыхар Магілёўскай вобласці (у першым выпадку кіроўца таксама быў з Магілёўшчыны) 1968 года нараджэння не справіўся з кіраваннем аўтамабілем Рэно, выехаў на паласу сустрэчнага руху і сутыкнуўся з аўтамабілем Опель. Кіроўца Опеля 1959 года нараджэння атрымаў медычную дапамогу і быў адпушчаны. А кіроўца Рэно загінуў на месцы. Акрамя таго, значныя траўмы атрымалі пасажыры Рэно - 18-гадовая дзяўчына, 17-гадовы хлопец і 42-гадовая жанчына. Усе пасажыры былі шпіталізаваныя, а праз некалькі гадзін маладая дзяўчына памерла ў бальніцы.
