На аўкцыён з пачатковай цаной у адну базавую велічыню выстаўлена цагляная ваданапорная вежа, якая знаходзіцца ў вёсцы Юрцава Аршанскага раёна. Трохпавярховы цагляны будынак вежы агульнай плошчай крыху больш за 45 квадратных метраў быў узведзены ў 1957 годзе. У лот таксама ўваходзіць артэзіянская свідравіна і права арэнды на 25 гадоў зямельнага ўчастка плошчай 0,0212 гектара. Аўкцыён па продажы гэтага аб'екта нерухомасці адбудзецца 5 сакавіка ў будынку камітэта "Віцебскаблмаёмасць" у Віцебску, пачатак у 15:00.
Як піша сайт "Народныя навіны Віцебска", у 2018 годзе жыхарка Лёзненскага раёна купіла падобную, але сяміпавярховую, вежу ў Зубаўскім сельсавеце Аршанскага раёна. Тады ёй прыйшлося выкласці больш за 6500 даляраў.
