Акцыі пратэсту супраць так званай «Паглыбленай інтэграцыі» з Расеяй і пуцінскім рэжымам ужо сталі рэгулярнымі для Мінска. Некаторыя акцыі прайшлі і іншых гарадах. Праўда, рэальна паўнавартасны фармат рэгіянальныя акцыі мелі толькі ў Гродна, у астатніх гарадах пакуль такія акцыі мелі больш сімвалічны характар — без заклікаў да шырокай грамадскасці.

Але колькасць гарадоў, якія далучаюцца да пратэсту расце і, магчыма, таму адзін з арганізатараў мінскіх акцыяў аршанец Павел Севярынец на днях праз сацыяльныя сеткі пачаў распаўсюджваць заклік да акцыяў ва ўсіх гарадах краіны. Прычым заклікае ён 29 чысла выйсці на плошчу ў Мінску, а паралельна і ва ўсіх гарадах. Тое, што ў Мінску збярэцца чарговая акцыя пытанняў няма, а вось наколькі асмеляцца людзі выйсці ў рэгіёнах — гэта пытанне.

У сувязі з гэтым мы прапануем вам самім адказаць на пытанне «Ці пайшлі б вы на акцыю пратэсту, калі б яна адбывалася ў Оршы»? На галоўнай старонцы нашага сайту размешчана адпаведнае апытанне ў якім можа прыняць удзел любы наведвальнік нашага сайту.

Апошні раз масавыя акцыі пратэсту па вялікіх гарадах краіны прайшлі ў сувязі з «Дэкрэтам пра дармаедства» і тады Орша стала найбольш актыўным удзельнікам гэтай акцыі — па колькасці насельніцтва ў горадзе ў Оршы на плошчу выйшла найбольш людзей.